Balada Kalak Ngayak

“Bagi kuda siitajurlah anak singuda
Meter perkiamna la mbewat nahena
La erpenandai ukur-labuh ngayaki sura-sura
Kemalun di la maba luah ergan asa emas pirak suasa”

Nande beru Karo erpedah tangkas sorana
Tendang datas tumba enggo urak pergarana
Muniken isi pusuh si geneng bas mata
Sontil i kusur ukur erbelas lanai ersora


Bapa si la mbue cakap lenga melasken kata
Rikut gebuk isap kabang meganjang ukurna
Idudurkena tumbuk lada rempu pirak suasa
Gendek katana tapi buahna kerina

“Enda tinading nini bulang si la kutandai rupana
Terberita merawa bujur, la lit nogansa
Berkatlah ku taneh jawa tutusi nggeluh la pagi erkadiola
Pang masap di sura-sura la terjaka”

Musim ngeigas kentang meseng
Lembu kerbo megulang guradang
Manuk ni asuh lesap kena bernung
Ukur piher la tertebeng

Tah terjaka sura-sura, luah erluncah
Ise ngasup nuriken wari si pepagi?
Cirem ayo nande beru Karo tertunduh
Ngidah sabugan tekuak datas bide

Jatibening, Mei 2007

*) pernah dimuat di Tabloid Sora Mido Edisi Mei-Juni 2007

Oleh : Simson Gintings