KARO dalam FILOSOFI (Pedah-Pedah)

Adi kita kalak karo arus erkeleng ate erDibata, tengah rukur, pang rawin jemba, pang empo, pang nereh, adi getuk ateta kalak getuk lebe dagingta. Tawa pe ola tawasa. Tangis pe ola tangissa, adi ridi ibas lau malir, ula jului kalak ridi, adi tapin pancur, ermbuah lebe. ngerana ula metuda, ula mederngas, mbacar ras metami. mejingkat, ula murbit, ula metik-tik, meteh mela, meteh mehangke, meteh mereha nggeluh ermalu-malu ibas simehuli.

Adi mengga ate bagin kalak, bahan ajangta, mehamat man kalimbubu, metengget man senina, metami man anak beru, adi erlajang daramilah Bapa Nande metengget ras terbeluh, em asam gedang-gedang tinali dua tampukna. Lit nge pengadin-ngadin batu megulang. Adi mbiar mbalu tah baluken kalak, ola empo, kalak siugapa pe perlu tungkir, adi tawa kalak ikutken tawa, adi tangis kalak ikutken tangis, ngeluh enda lit nge pernangkeng-nangkengen lit nge pergincuah-ngincuahen.

Padanta ras Dibata si ndube labo terelukken. adi sidahi sada kerja, sitandailah man banta ise kita, anak beru, senina, ntah kalimbubu. Inganilah ibas jabunta, banci merawa tapi ola meringes banci rubat ibas jabu, tapi ula nusahi kalak. Sidungilah meter persoalen jabuta, sebelah rumah pe perlu betehen, meriahlah kal minter.

Mbue denga kal kiniteken pemena silenga ibelasken ijenda, sebab nininta kalak karo melala kal pemetehna simehuli man asam geluhta, erkiteken la sipelajari, piahna enggo melala bene, emakla labo tadingsa denga, mulai genduari narilah gia ulihi sipelajari gelah ula bene pemeteh ninita si melias