Perlengkapen Penjayon Si Erjabu

(1) LAMPU SUMAGAN
(2) AMAK DABUHEN
(3) KUDIN, BERAS
(4) PIRING
(5) ALAT DAPUR
(6) AMAK BELANG
(7) MANUK SI INDUNG-INDUNG

Si 7 (pitu) enda gunana / terkait ras beltek des nikuanken :

(1) Ula sempat pajek gara api

(2) Kalak Karo kebiarenna e me mbiar lanai man

(3) Adi lumben labo banci ibenaken ercakap, e maka tep-tep jumpa jelma leben nge iorati perpanna, idurdurken isapna tah pinangko/perampok gia sireh e.

Genduari : enggo tambah, igulati nge kerna perladek kuh sangkep nggeluh guna ncidahken keriahen ukurna man si erjabu guna penjayonna i tengah jambur, ilebuhi nge kerina, salih jadi kalak si mindo-mindo (pengemis) – INDIVDUALIS – KAPITALIS – MATERIALISTIK.

PENEJELASEN KERNA ERTI RAS MAKNA PERLENGKAPEN PENJAYON SI ERJABU:

1. LAMPU SUMAGAN e me tendang si enggo isagani, banci berupa lampu semprong, lampu gas/petromak, lampu teplok. Enda me ibereken kalimbubu si ngalo bere-bere man si erjabu. Maka isanggani, enda pe lit antusenna e me gelah terang lalap pengidah, terang perukuren si erjabu seh maka seri penatapna ku sider ras bertengna, la sikapit-kapit/ situngkat galuhna

2. AMAK e me

• Ingandu tayang i bas kam latih erdahin
• Guna ngukuri kai pepagi sidahi dahinta
• Inganndu arih-arih dilaki ras si diberu muat si mehuli
• Inganndu medem – tunduh duana.

3. KUDIN/ALAT DAPUR, BERAS PIHER

Antusenna : gelah ula pepagi sempat pajek gara api e, gelah ula lumben.

4. MANUK SI INDUNG-INDUNG E me

• Si man asuhen si erjabu labo man gelehen, tapi jadi perindungen (Merih manuk ni asuh), gelah bicara reh pe pagi kade-kadi enggo lit anak manuk enda jadi bengkau si man pesikapen
• Makna terdalam (ideologi) gelah si erjabu ngusih pergeluh manuk si indung-indung enda ndai, megegeh ngepkep anak si enggo tubuh i tengah-tengah jabu.

Genduari melala siidah ras sijumpai maka luah kalimbubu si ngalo ciken-ciken/perninin/perkempun e me tergelar manuk si indung-indung. Enda me igeleh jadi manuk pukulen (mukul) man si erjabu. Em perbahan enggo mbue jelma la ngantusi pengertin aslina kerna manuk si indung-indung enda.

5. TAMBAHEN, SEKIN MAN SI DILAKI
Selaku anak beru i bas jabu kalimbubu maka ia me pepagi si lampasna reh, tapi ia ka nge si melawenna mulih; simbol sekin tugas anak beru nikapken perlengkapen konsumsi i bas lakon kalimbubuna gelah sikap, ranting, nektek tulan adum gulen ras si debanna.