TABAS SI MALANG DELENG

Hong kalasa, kalasa hong
Hong kalasi, kalasi hong
Mari me kam nini jinujung
Nini kami si malangsang
Nini kami raja kalopung
Ras juak-juakndu pepulung
Si Nabo, si Ari pe i undang
Si Tonu, si Dara ola tading

Kulintang-lintang sanga terang
Tongkoh perminaken bulung
I jenda amak enggo kimbang
Amak kundulen inganndu ertimbang

Hong kalasa, kalasa hong
Hong kalasi, kalasi hong
Nini kami si malangsang
Nini kami raja kalopung
Dengkeh kempundu si malang-malang
Malang-malang menam keleng-leng
Keleng-leng kertah niutahken deleng
Deleng si ndube melias perkeleng
Megati denga mbatuk gia ngkelang

Hong kalasa, kalasa hong
Hong kalasi, kalasi hong
Nini kami si malangsang
Nini kami raja kalopung
Duana kam erbahan mang-mang
Mangmang si mehuli er-rudang rudang
Rudang si mejile ras merim la teralang
Gelah entabeh pertunduh nini deleng
Gelah ula pinakitna salih ku batuk gedang

Hong kalasa, kalasa hong
Hong kalasi, kalasi hong
Nini kami si malangsang
Nini kami raja kalopung
Suruh juak-juakndu ku sider berteng
Pepulung kerina si la teng-teng
si erkuasa tapi anceng
si erkuasa tapi genjeng
si erbahan nembeh nini deleng
Suruh i babana ku begu ganjang

Hong kalasa, kalasa hong
Hong kalasi, kalasi hong
Nini kami si malangsang
Nini kami raja kalopung
Teruh nari kam si natang-natang
Datas nari kam me jadi payung
Pudi nari kam si njemba gurung
Lebe nari kam si mabai igung
Kawes, kemuhen kam si ngkeleng
Jagai kempundu si malang-malang
Si kitik denga bagepe si enggo galang
Ibas gelap bagepe ibas wari terang

Karya : H. M. Sitepu
(Bangka, 31/10/13)